لسلام عليكم
ديه خلطه بعملها لرسم الحنه وهى سهله جدا l
المقادير 1_ صبغه حجر من العطار وهاتى طمن وهى رخيصه
2_ حنه اى حنه ناعمه جدا وانخليها فى شاش خفيف لزيادة النعومه
3_ قرطاس وركزوا لانى قعدة كتير علشان اعرف هو بيتعمل ازاى واخيرا عرفت من اليوتيوب
هحاول اوصلكم فكرته هو عباره تقريبا عن مستطيل متساوى الاضلاع من مشمع تخين زى اللى بيجى مع الغساله اتوماتيك وممكن غيره بس انا بفضل المشمع التخين وضعى صباعك فى منتصف المستطيل من اخر حاجه فيه ولفى على صباعك حتى يعمل قرطاس (ممكن تعملى انتى قرطاس على طول ) بس الطريقه ديه بروفيشينل لان الصباع بيظبط معاكى
4_ لزق شفاف من المكتبه المدور الصغير اللى بتلزقى بيه الجلاد نسيه اسمه المهم الزقى بيه القرطاس كله بداية من اخر الى اعلى القرطاس ماعدا الفتحه اللى هتحطى منها الحنه
اعملى فتحه صغيره بالمقص فى اخرالقرطاس
5_ كيس مشمع عادى
6_ زجاجة اكسجين من الصيدليه او كريم اكسجين
الطريقه:
1_ ضعى الصبغه فى شوية ماء فى علبة سمنه اوعلبة تونا حديد وخلى بالك اوعى تضعيها فى اى وعاء اكل لانها سامه فى الاكل وابعدى الاطفال وانتى بتعملى الخلطه
2_ضعى الخلطه على النار حتى تدوب الصبغه وبعدين جيبى الحنه بعد نخلها وصبى وحده وحده حتى تصبح عجينه
ضعى العجينه فى كيس بلاستيك واخرمى خرم كبير وضعى القرطاس ده داخل القرطاس اللى هترسمى بيه واضغطى عليه بقوه حتى تنزل العجينه الى بوذ قرطاس الرسم وبعدين اسحبيه وبعدين اغلقى قرطاس الرسم بالسلوبت اللزق (هو اسمه كده قولولى) والزقى جامد وارسمى بكل ثقه واوعى ايدك تهتز وانتى بترسمى وقولى لنفسك وانتلى بترسمى انك حريفه لذيادة الثقه هبل
3_ بعدما ترسمى سيبى الرسم يجف جدا جدا
4_ بعدما يجف قشريه ونظفي بواقيه بقماشه جافه
5- هاتى سلاكة الاذن وضعى عليها اكسجين وامشى بالضبط على الرسم والبسى جوانتى اوكيس فى ايدينك فى المرحله ديه او خلى حد اخر غير اللى رسم يعملها حتى علشان ايدك ما تسوديش وهتلاقى الرسم بيسود وحده وحده وعندما يسود خالص اشطفيه ومبرووووووك لولوووووولى